Прадпрыемства холдынгу «Беларуская цэментная кампанія» – філіял «Магілёўжалезабетон» ААТ «Крычаўцэментнашыфер» увёў у эксплуатацыю сучасны станок плазменнай рэзкі

З красавіка «Магілёўжалезабетон» працуе на новым высокатэхналагічным абсталяванні, дзякуючы якому знізіліся выдаткі на вытворчасць, павялічылася прадукцыйнасць працы і палепшылася якасць прадукцыі. Станок абыйшоўся амаль у 96 тысяч рублёў. Вытворца – расейскі, камплектуючыя кітайскія, значыць, праблем з абслугоўваннем не чакаецца.

– Раней мы карысталіся газавым разаком, і на падрыхтоўку толькі адной закладной дэталі сыходзіла каля 40 хвілін, пры тым, што на вырабе іх было да 16 штук. З купляй жа новага станка плазменнай рэзкі з ЧПУ Dragon 3.0 значна знізіліся працавыдаткі пры вырабе закладных дэталяў, а прадукцыйнасць арматурнага ўчастка істотна павялічылася, – распавёў дырэктар завода Уладзімір Кісялёў. – Такое абсталяванне можа і само ліст раскроіць і «выпякчы» неабходныя адтуліны, варта толькі задаць каардынатную кропку. Максімум 40 хвілін займае цяпер праца над усім лістом, 2 м на 1,5 м. Працэс паскорыўся ў разы. У працы выкарыстоўваецца толькі кісларод і электраэнергія, што дазваляе знізіць патрэбнасць у прапане.
Аўтаматычная налада дапамагае больш эканомна выкарыстоўваць электраэнергію. Яшчэ адзін плюс – павышэнне якасці прадукцыі. Дакладнасць кіравання – плюс-мінус 0,1 мм, не з'яўляецца эфект вострых беражкоў,  «ірванай» паверхні. Акрамя таго, у параўнанні з метадам газавай рэзкі палепшыліся ўмовы працы ў плане бяспекі. Аператар кіруе вытворчасцю дэталяў на адлегласці, з убудаванай панэлі, абсталяванай дысплеем. Персанал спецыяльна навучаны.

Па словах Уладзіміра Уладзіміравіча, калі раней шэраг вырабаў, неабходных для вытворчасці, даводзілася закупляць, то сёння завод уласнымі сіламі вырабляе бронь на бетоназмяшальнікі, элементы борт-аснасткі для вент-блокаў, расходныя вузлы для сліп-формера. Прадпрыемства можа зараз рэзаць любы тып металу, а значыць, асвойваць новыя віды прадукцыі і аказваць новыя паслугі.